主持：李樹明（《資本雜誌》副總編輯）
嘉賓講者：
施永青先生（中原集團創辦人）
黃國英先生（豐盛金融集團資產管理董事）
呂志華先生（確思傳信財經顧問有限公司董事總經理）
主持李樹明： 首先想問施生，我有個朋友最近好好彩，中咗五百萬六合彩，想用嚟投資，咁買股定係買樓好？
施永青：買樓更要考慮經常性收入，唔可以只係計一筆過收入。如果佢根本冇其他經常性收入，佢淨係渣住果五百萬……（主持：閒錢嚟嘅）同埋投資地產呢，你要考慮埋其他資產組合嘛，如果你已經有好多樓，你就買吓其他資產，買吓股票。
但如果你話唔好考慮咁多啦， 我就唔駁故喇。五百萬買樓好定買股好？如果純粹講價值，而家股票應該係抵買過樓，買地產公司嘅股票有discount，即係佢資產值有折扣比你，而回報派息又好過樓，樓得一厘兩厘。緊係唔夠股好，但買股有個最大問題，佢嘅優點都係缺點，話出就出，話入就入，太容易買賣，好容易作錯決定。
主持李樹明：不如我又問黃國英先生，而家買細價股好定係700好？
黃國英： 如果呢兩個揀都仲係買700先嘅，同埋五百萬又唔洗一注訓身，可以打散嚟買。而家700依然係家居必備。（主團：尋日破哂頂喇喎？）冇關係嘅，你唔夠膽講一間升左幾百倍嘅公司唔可以升多十倍。同埋佢牽涉範圍太大，十年前你想像唔到佢一個遊戲一日可以賺過億，呢個想像空間好大，同埋佢執行能力好強。你再諗吓你下一代，當個仔問你果時點解冇買騰訊既？你都唔知點答佢。
而細價股嘅選擇起碼要五、六十億先。開始有好多人睇唔起啲公司做太耐都唔夠市值，入唔到深港通，啲人覺得你商業模式有問題，咁耐都攀升唔到果個檔次，市場唔係太鍾意你。所以你點都掙扎過左五十億先，跟住就開始有機會，今年好明顯一堆咁樣市值嘅公司加入深港通就升左好多吓，所以我覺得香港而家忽然之間變左個五十億俱樂部，過左呢個數就有得玩下。
主持李樹明：呂志華先生，你最近有篇〈百萬窮翁〉引起好大回響，咁我就想問，你講咗個問題出黎之後，能唔能夠令佢地解決問題，成為千萬富翁呢？
呂志華：我想講一講我以前都係做股評人，耐唔耐上傳媒講野，但而家就冇人識我，因為歸隱江湖好多年。呢期最紅當然係黃國英先生。至於點解我停左唔講，因為我發現到，原來投資唔洗每日估升同跌，你估啱咗啲讀者唔會覺得你叻，覺得你好彩啫。你講錯左啲讀者就開心，話呢個係明燈，烏咀明燈。
而我又發現到，投資想成功，你只要睇番過去幾十年果啲成功人士做嘅嘢，你學番佢，咁你就會成功。你會發現到呢啲成功嘅人一定係揸股揸樓，正所謂「揸股揸樓，晚景無憂，拎住現金，遲早揸兜」。你睇番過去果三十年通脹真係好犀利，有一日我經過旺角，你知唔知油條幾錢條？12蚊一條，菠蘿包7蚊個。所以我成日同人講，晌香港，揸波羅包揸蛋撻都唔好揸港紙，揸港紙係輸緊。所以好多年前，一個我好尊敬嘅專欄作家曹仁超先生講過一個故事，某巴士站有十個人等緊巴士，突然間有個招牌跌左落黎，跌傷呢十個人，其中有兩個係白領，其他八個都係百萬富翁。我最近寫，咁橋又有十個人，而家係傷兩個百萬富翁，其他都係千萬富翁。所以香港，買股買樓，係有買貴冇買錯。長線黎講係一定贏現金。
主持李樹明：我想問吓施生，晌三十年前《資本雜誌》創刊時買樓到而家一定唔會輸， 呢三十年黎，樓一定贏硬。不過其間又有好多人輸錢，你點睇？
施永青：全世界樓價，只要地方經濟增長，地價就會跟住升。地價取決於土地上面嘅人嘅生產力，如果經濟好，科技進步，咁人嘅生產力上升，土地價格同樓價一定同步上升。但係樓係有週期，升嘅時候升到你唔信，撻就跌到直哂。而且好多時樓都係做按揭，三成首期，七成按揭。樓價一旦跌超過三成，就變負資產，銀行就會迫倉。當你陷自己於咁嘅境地，就唔係買親實賺。譬如現時，樓價可能偏高，你啱啱買完個市跌，就風險大。當然我唔係話而家你買完就會跌。我係指你要衡量自己嘅持貨能力，首期要預鬆少少。
主持李樹明：我又想問問黃國英先生，十九大之後買咩版塊？
黃國英： 我地睇得個市非常好，大陸有統計，A股開account，只有0.5%買過港股通。呢0.5% 向上升係十分容易嘅。我上去大陸嘅時候，以前啲人覺得香港係龍潭虎穴，外資控制大局，好難賭，但而家恆大、融創、吉利反映香港外資唔識睇中國股票。內地人就覺得平到嘔。我內地識人買十億融創，贏咗六億，晌當地成為咗偶像。佢地覺得香港嘅股票好平，有金執咁。其實成個market都相當ok，但你好明顯見到，國內鍾意同唔鍾意嘅分別，唔鍾意中移動就永遠係咁。
所以我嘅睇法係，騰訊就一定唔減，唔敢減仲一路加。廢事揸得太少，比佢升得太高拋甩左。我自己亦揀左一大堆五至六十億中型股，而係未入港股通嘅。我覺得出年有一段佢地會升得比較多。理論上我地應該出年年頭先買，但舊年經歷到走甩咗隻長飛光纖。我地今年就早啲入，最近就中咗中農包裝，同我地買個位比升左六十幾個percent。而我覺得消費係一個好大嘅潛力，你睇日本二十年嚟第一次一大堆公司瘋狂加價，而中國又有一大堆公司加價，速遞公司、酒公司都加價。你會見到retailer以前個問題係加唔到價，今年中國嘅情況係生產者物價指數轉正，經歷咗六、七年負數轉正，原本啲人好驚原材料升左，但如果零售升唔到，經濟會縮。但今次經濟復蘇唔同，有通脹，對零售股係好。
主持李樹明：我又想請教吓呂志華先生，晌通脹之中，果百萬窮翁可以點樣保住消費能力？
呂志華：頭先兩位專家都講咗，而家買股票係非常之抵，但千其唔好揀中五十隻不能炒的股票。而樓市又買唔買得過？而家呢個位，等入市嘅人都係心口有個勇字。但係長遠嚟睇，樓市每一次跌，有錢嘅人都會肯買，我唔敢講最終能跑贏大市，但起碼能夠與時並進。
主持李樹明：不如我地再討論吓樓市問題，台下好多嘉賓對樓市好緊張，以我所知好多人都揸四五層樓以上。但領導人話樓係用嚟住而唔係用嚟炒，會唔會影響香港樓價呢？
施永青：我相信對大陸樓價影響多啲。香港都仲係有一國兩制嘅。不過香港政府其實都想香港樓係用黎住，唔係用嚟炒。但樓嘅特色係有投資價值，即使買居屋，市好先至搶。而想人買樓而唔考慮投資價值係做不到嘅。所以我認為香港樓價反映嘅唔係用家嘅購買力，而係反映嘅係投資者嘅偏好，即係有錢人想將錢存放晌咩類別嘅資產。到呢一刻香港人對樓嘅偏好仍然係好過股。所以樓晌佢地資產組合入面係佔相對高。如果呢個取態冇變，樓價唔會點跌。而香港銀行嘅錢係好犀利。九七年，銀行有幾多存款？係二萬七千億，而家係十二萬億有突，係九七時四倍幾。但樓價比九七時只升咗60%，如果呢啲錢全部流入地產市場，買哂全香港嘅住宅樓都有餘。所以如果從這個角度睇，樓價反映社會資金狀況，現時樓價遠遠未升完。
主持李樹明：我想問問黃國英先生，現時恆指二萬八千幾，會否上到三萬？
黃國英：三萬太少。現時港股有三十萬億股票，而國內人只佔2-3%，以前國內人當香港係龍潭虎穴，而家覺得香港係金礦。你國內啲錢會繼續落黎，而銀行存款又仲有好多，個大市會繼續上升。好多人幻想跌番26000，然後再上。但你冇一啲好驚嚇嘅事件。舊年脫歐係好重要嘅訓練，訓練到啲人咩都唔驚。你唔好講地緣政治，就算金仔射導彈都唔驚。咁嘅勢好難回。你睇番日本兩個禮拜狂升十幾個percent，其實我地升得好克制。
問答環節
台下嘉賓：近排中環有單大deal，四百幾億賣樓，而上市大股東又減持，我想問問台上專家，我地應該何去何從？
施永青：中環中心係好難有另一個類似大廈比較。成棟式整棟寫字樓，內地好多大戶都想晌香港買，由其係中環，呢啲樓成交價錢會比一層一層多。而家賣左呢棟，如果再有人嚟，仲有咩好介紹呢？。選擇少，先至賣到好價錢。至於大股東有時減持係會減錯，騰訊老闆前一輪先減持，如果你跟住佢減持，就走寶。
黃國英：對佢黎講騰訊個本係零，佢唔沽貨，拎住啲股票係供奉嘅啫。對佢黎講，要改善生活，慢慢搣好正常。你睇Facebook老闆第一次沽貨係30幾蚊，而家係180蚊。所以沽貨同個價係完全無關係。佢第一次有一個巨型收入，忍唔住沽係好正常。至於誠哥沽香港野，佢係好多地方有資產互換。佢覺得香港回報率低，有人出高價，呢度沽完咪再搵個機會。
記錄：秦晞輝
在剛過去的週四（11月2日），《資本雜誌》舉行三十週年晚宴，同場邀請到幾位重量級嘉賓分享對未來一年股市和樓市看法。左起嘉賓：呂志華、黃國英、施永青。右為主持李樹明。
施永青先生（中原集團創辦人）在論壇中分享對樓市看法
黃國英先生（豐盛金融集團資產管理董事）分享對股市看法
